一直以來，都好鍾意踩單車；近一年來，因為擁有咗自己嘅單車，可以日日夜夜都踩，非常滿足！之前已經好想將踩過嘅路段記錄落嚟，曾經就用過小型嘅GPS Tracker，但效果唔係太理想。到自己有單車時，個Tracker亦已經壞咗。其實依家好多智能手機都有GPS+AGPS，絕對有足夠功能去做到呢個目的！
依家介紹呢個手機程式，絕對係愛運動人士必備！
Endomondo係個運動追蹤程式，市面上絕大部份智能手機（iPhone、Android、BlackBerry、Windows Phone 7/Windows Mobile、Symbian甚至Java）都可以裝到，差唔多只要有GPS就可以用，而且仲係免費添，唔使一定要買隻表或者鞋！
安裝咗之後會需要註冊，我就選擇咗經facebook註冊。開咗之後個畫面簡單而清澈：
上面就係運動嘅時間，中間可以揀運動項目，下面個貌似play/pause/stop個制當然就係開始、暫停、結束啦！運動時，程式會有語音提示每段落/每個圈嘅時間、總時間、計時暫停、計時重啟、仲有倒數開始等等，當然全部都可以喺設定入面改啦！
Endomondo功能好強，除咗可以記錄低運動路線、時間以外，仲可以將運動記錄，上傳到endomondo.com。網上仲有大量有關運動嘅分析，包括總運動距離、時間、最佳時間等等，所有都一目瞭然！另外，如果啟用facebook connect，每次運動都會上傳到facebook，等朋友們可以同你打打氣，又可以激勵吓大家做多啲運動！當然，手機上嘅介面都可以睇返之前嘅記錄等嘅資料啦！
Endomondo亦可以預先自定運動路線、目標等等，而且可以分享俾其他人用都得！另外，endomondo都可以配合其他運動追蹤、記錄嘅device，例如心跳計、高級嘅單車咪表（好似要俾錢嘅專業版先用到，我無device無得試），又可以直接將其他追蹤器嘅GPX檔，或者做GYM啲器械記錄等等，直接上傳到個網，極盡專業、詳細！
講咗咁多，都只係部份功能，功能真係超強勁呀！
PS： 點解叫endomondo？
Endo係安多酚(endorphins)嘅簡寫，做運動時候嘅一種腦分泌；
Mondo係世界語中代表世界；
所以，endomondo即係安多酚的世界喇！
結連：
